人愈大愈討厭生病
以前中學雞病嘅時侯係開心，因為可以請假留係屋企打機睇電視，仲記得沙士流行，學校強制性朝早探熱，邊個體溫過高就會被逼返屋企，嗰陣會同成班同學係老師未黎之前，係條走廊到喪跑，跑到個人興恰恰之後就去探熱，為嘅就係一個額外假期。
但人大左，愈清楚知道咩叫做『得閒死唔得閒病』依個驚世名言。返工時侯，你病係一件好麻煩嘅事，你可以請病假但就麻煩好多同事，因為你身上揹負住好多Project，就算你病到就黎死，都要頂硬上返工完成工作，之後先好返屋企休息。
琴日起身已經知道自己又黎料，自從返工之後，身體開始愈黎愈差，經常性肚痛，易感冒，易病，唔知係咪工作壓力定係我生活習慣不嬲都唔健康。但琴日有活動要做，所以拎個口罩就返工了，一路返工一路都好辛苦，但都撐落去。
『阿媽，今晚唔返黎食!』
每次我病嘅時侯，我都唔會同屋企人講，因為佢地實會好多說話，咩叫左你著多D衫，早D訓等等，之後每幾粒鐘就打黎問你食左藥未又問你好返未，雖然係關心我，但我寧願病都唔想咁煩，最後久而久之，病左都唔會同人講。
朋友，以前都會同人地講病左，或者係Facebook貼成堆藥嘅相但都知道大概換黎咩結果，都係類似“take care~”等等說話，睇得多就自然無咩感覺，反而覺得有啲博關心嘅感覺。
夜晚嗰餐先係重點，夜市想搵間有粥賣嘅店仲難搵過G點，嗰刻會諗如果話左比屋企人聽，我應該唔洗煩依個問題。
平時都到死嗰刻都唔會睇醫生，因為覺得小病自然會好，睇醫生花幾舊水係唔值得，但琴日頂唔順去左睇，竟然睇左成3舊水，肉痛到呢......嗰刻真係寧願死都唔想睇醫生，極度後悔，醫生仲開埋抗生素，大家都知食得多對身體唔好，最後我都無食到。
根據過往經驗，夜晚係重點，我關上房門，買左成堆水同紙巾，好似啲人戒毒咁，準備打仗。藥令人眼訓同累，加上鼻塞逼住用口透氣，但喉嚨已經又乾又痛，結果成晚無訓過，仲因為飲左太多水，每幾粒鐘起身去廁所，呆呆咁攤係張床到，係到諗點解要攪成咁呢，依種病嘅處理經歷又要過幾多次呢? 真係玩下手隨時死左都無人知。
呻吟左成晚，朝早起身又係新嘅一天，我大概又戰勝左病魔，但琴晚忍唔住食左抗生素就唔可以停，要食足5日。起身梳洗，對住塊鏡，不禁笑了，從來有事或者遇到難題都係靠自己一個人去攪掂，有啲佩服自己，但內心深處其實都想人關心，孤軍作戰係唔好受。
睇黎開始買對跑鞋實行跑步計劃，早訓，戒宵夜，戒口 (間中)......
天氣開始轉涼啦，各位讀者真係著多啲衫小心病到，唔好扮型扮大隻而唔著衫。個腦又諗起句驚世名言，『條路自己揀，仆街唔好喊!』
病好轉了，休息多24小時都無，明早又要返工了，這就是打工仔世界。
Search